نشطاء «تويتر» عن احتفالات أكتوبر .. طائرات بالجو وزحمة على الأرض وحظر بالليل

علي المالكي و محمد كساب

أثارت العروض الجوية التي بدأت القوات المسلحة في تقديمها، الثلاثاء، في إطار الاحتفالات بالذكرى الـ40 لحرب أكتوبر، ردود فعل واسعة بين النشطاء من مستخدمي «تويتر» وسط تعليقات تهكمية من اختراقها لحاجز الصوت بالقاهرة ومحافظات عدة، بينما يعاني المواطنون من وطأة الزحمة والتكدس بوسائل المواصلات انتهاءً بحظر التجول ليلا، حسب قولهم.

وكتب «أحمد عبدالله»، متسائلا «يا ترى شعور المواطن إيه إن المترو متكدس والشوارع ما بتتحركش ومش عارف يروح شغله.. بينما فوقه طيارات بتكسر حاجز الصوت؟»، ومثله قال حساب «@mabdelsameea»: «وهم كده بيحتفلوا بـ 6 أكتوبر.. الشوارع متروسة والناس تبص فوقها تلاقي طيارات بتكسر حاجز الصوت».

في حين ذكرت « @RAshry_» أنها تواجه زحاما شديدا في طريقها، وأوضحت: «تبقى واقف في الزحمة على طريق السويس، تعدي فوق دماغك طيارات تكسر حاجز الصوت تجبلك صداع.. إحنا بنتعذب في البلد دي والله».

وأضاف «@EslamZezza»: «اديني في الخمسات والدريفتات اللي بتعملها طيارات احتفالات أكتوبر وإحنا محشورين في الزحمة».

وتابع « @Hussein_Elyadak»، قائلا: «نشن يا ع البيت خلينا نرتاح هيبقي بليل حظر والصبح طيارات».

فيما سخر آخرون من استمرار تحليق الطائرات على مستوى منخفض من المناطق السكنية والجامعات، وقالت «‏@SarOoOoOo2»: «فيه طيارات تايهة بتكسر حاجز الصوت عالبحر #اسكندرية»، وكتب «محمد عشري»: «تقريبا في طيارات حربية (بتخمس) فوق الجامعة».

وكتبت «سمر فتح الله»: «أحب أقول للسيسي كفاية.. عرفنا إن عندنا طيارات»، أما «أسماء فريد» فأشارت إلى أن «عدد طيارات الجيش اللي عدت فوق بتنا حسستني فجأة إن البيت هو المطار الخاص بيهم».

واعتبر «عمر مجدي» أن «الجيش بيسخن علشان 6 أكتوبر»، وتساءل «عمر خليف»: «كل دي طيارات ولسه  1october أمال 6 october هتعمل إيه»، وقالت «رويدا حسني»: «الناس كلها سمعت صوت طيارات إلا أنا ليه يا كابتن مدحت».

يأتي هذا فيما شهدت ساحة «تويتر» سجالا كلاميا بين أنصار «الإخوان» ومؤيدي الفريق عبد الفتاح السيسي، حيث قالت «@shoshotarek»: «لو مرسي اللى كان عامل كده مثلا مثلا وبيقول احتفاﻻت قوات مسلحة كانوا خربوا بيت أبوه وبتلعب بالبنزين وإحنا مش ﻻقينه لكن السيسى حلو مفيش كلام»، فرد عليها حساب حمل اسمه «@gnonelhaball» بأن «بنزين طيارات في احتفالات وطنية عمل فيها مرسي بارتي إرهابيين في الاستاد ولا موظف واحد ياكل بـ 30 ألف سندوتشات في شهر».

واعتبرت «هاجر شلبي»، واحدة من أنصار مرسي أن تحليق طيارات F16 في الإسكندرية هدفه عمل «حرب نفسية»،  وأضافت: «الطائرات دي بفلوسنا اللي أنت فرحان بيها يا روح طنط  #6أكتوبر برده نازلين».

وقال «@asmerelloon»: «تانى يوم أروح الكلية وفي المرتين كان فيه وقفة للإخوان ومؤيديهم بس النهارده حصل حاجة كيفتنى أوى سرب طيارات حربية».

ومن المقرر أن تقدم طائرات حربية تابعة للقوات الجوية عروضاً في سماء القاهرة والمحافظات طوال الفترة من 1 إلى 6 أكتوبر الجاري.